हमर जिनगी ल बनाये खातिर

Cमोर महतारी अऊ मोर ददा
कईसन मेहनत करत हे
हमर जिनगी ल बनाये खातिर
अपन सरीर ल भजथे
भिनसहरे ले उठ के दुनो
पानी कांजी भरत हे
आट परसार अऊ खोर दुवार
महतारी सब ल लिपत हे
गरुआ भैंइसा के चारा दाना
ददा के भरोसे हे
गोरस दुह के वो बिचारा
दू पइसा म बेचत हे
अपन शउख के बलि देके
हमर बर पइसा जोरत हे
हम पढ़ लिख जाबो
कुछ बन जाबो
इहि सोच के मरत हे
बासी पसिया खा के ददा
खार म जांगर पेरत हे
घाम छाह अऊ बादर पानी
सबो म नांगर जोतत हे
उखर करजा ल कइसे उतारबो
इही सोंच के मन झकत हे
उखर उमिद ल नि डोलान
हमू ल मेहनत करना हे
उनखर सेवा करके संगी
हमू ल जीवन तरना हे